الى اخى الكريم الاستاذ مصطفى حضرتك ماشاء الله
كتابتك فيها قوة خط الثلث وكان ليا تعقيب وبعض الملاحظات بعد اذن حضرتك
ممكن اقولها واتناقش مع حضرتك فيها لانى بدرس الخط وممكن تكون عند حضرتك معلومات تفيدنى
فى الجمله الاولى لحضرتك البيت الحرام كلمة البيت اللام بتكون 8 نقاط من الخارج لانها متصله وممكن تقصر فى حالة اتصالها بالحاء والسنه التانيه فى كلمة البيت بتكون نقطتين هى طولت مع حضرتك شويه وعمق حرف الباء بيكون نقطه كامله وفكلمة الحرام نزول الراء والميم بيكون ثلاث نقاط والحاء طولت من حضرتك شويه
ولفظ الجلاله اللام الاولى تساوى الثانيه والف الهاء تكون اقصر بمقدار نص نقطه والاتساع فى الاولى بيكون من تحت نقطه ونصف ومن فوق نقطه واحده وبين اللام التانيه والف الهاء من تحت نقطتين ومن فوق نقطه ونص والهاء بتلف على نقطه ومن فوق نقطتين وبتكون نهاية الهاء اقصر من الفها بنص نقطه
وكلمة محمد المسافه بين اتصال الميم والحاء والدال من الداخل بتكون اضيق والدال تساوى الميم
اما كلمة محمد مع الحاء الثعبانيه الحاء اتساعها من الداخل 5 نقاط بالعرض وثلاث نقاط بالطول وبيكون الفرق بين راس الحاء ونهاية الدوران نقطتين من الخارج
جملة حسبى الله اتساع الحاء بيكون نقطه واحده والسنه الاولى بعدها بتساوى الحليه بيكونوا فوق بعض والمسافه بين السنه الاولى من السين والتانيه بتكون نقطه ونص
فى جمله المسجد الحرام حضرتك لو ساويت بين الصواعد بيكون افضل خصوصا ان حضرتك كتبتها تركيب
والمسافه بين الميم والسين نقطه واحده
جملة ياحى ياقيوم اتصال الحاء مع الياء بتكون فيه مرونه ونهاية الياء بتساوى البدايه هى ارتفعت مع حضرتك شويه واتصال الباء مع الياء بيكون نقطه وكلمة قيوم اتصال الواو المساحه البيضاء من داخل راس الواو بتساوى عرض البوصه وارتفاعه بيكون تلتين عرض البوص
جملة رب يسر وارحم
حرف الباء نهايته الالتفاف على نقطه واتصال الحاء مع لميم بيكون فيه مرونه ونزول الميم والراء ثلاث نقاط بتكو نقطتين فى خط النسخ
كلمة منقذ المسافه بين الميم والنون بتكون نقطه ومبين القاف والذال نقطه
والبسمله اتصال الحاء مع النون طويل هو بيكون 6 نقاط والله اعلم
انا اسفه للاطاله ولكن انتهزتها فرصه للاستفاده من معلومات حضرتك وباقى الاعضاء
ولو معلوماتى فيها خطأ ارجو التصحيح من حضراتكم
والسلام عليكم ورحمة الله وبركاته
